反对派喺今年3月嘅立法会补选入面狂屈”基”，搞到民协基哥（冯检基）一直郁郁寡欢，宜家就开始基哥复仇记。基哥噚日就向传媒确认，佢会写新书讲自己喺政坛嘅”不愉快经历”，仲闹埋反对派”太政治化”、”政党有掣肘”，自己以后想做多啲民生嘢。咦，咁讲系咪要另起炉灶？基哥唔承认都唔否认，但成班屈基狂已经开始闹爆佢”死而不僵”，惊死佢会出嚟抢嚟紧立法会九龙西补选个议席咁。有同路人睇唔过眼基哥又俾人闹，反问点解只系”小丽老千（刘小丽）”钦点嘅工党李卓人先可以落场︰”人哥都选得，点解基哥唔选得 ? 大家都系老鬼。”

要讲反对派有几黑暗，睇基哥嘅遭遇就知。自从畀钱参加咗反对派嘅”初选”协调机制，就无厘啦更输咗畀冇地区桩脚嘅姚松炎，排第二按机制成为”Plan B”，都要俾人闹到趴咗喺度，明明姚松炎冇被DQ，但基哥咁就俾人DQ咗。到姚松炎选举策略惊人离地，最终仲输埋个选举，连后补资格都冇嘅基哥再次成为众矢之的，话系佢唔帮手拉票咁话。

呢几句简单概括，已经大致睇到基哥有几坎坷，出返本书可能都真系几有睇头㗎。不过，你要闹反对派咩？人哋率先”反弹你个反弹”，由佢疑似想退出民协大做文章，话佢系想参选九西补选喎。网上又开始有舆论攻势，似曾相识到好似”初选屈基事件”咁。

黄丝讥死而不僵早啲唞

“Lance Yan”话︰”民协=冯检基，早深入民心，对『民协』系有感情，唔该基哥荣休做荣誉顾问算，江湖都仲会比（畀）返几分薄面。如果基哥偏要不谈政治走中间路线，『民协』必被拖累，如果真系搞『民主思路』、『新思维2.0』，又四围挖角，又出书数臭『民主派』，招人唾骂做汤家驿（骅）、黄成智、狄志远2.0 ，就系咎由自取。”

其他人都一个闹得比一个狠。”Lam Ka Ming”亦话︰”人贵乎自知。没有自知之明。跟垃圾没分别。””Gabriel Li”形容︰”死而不殭（僵），totally（完全）退下去好过啦！你已经系明日黄花，个世界已经远你而去喇！”

“Denny Li”则闹爆基哥”不知所谓”︰” 到现在还发紧立法会议员梦，这位老人活到现在还不羞耻，如果不是他，姚松炎今次补选一定已经是立法会议员，冯检基，请快去见阎王爷爷谢罪，不要在香港政坛，有败『民主派』的声誉。”

不过有人就觉得，就算基哥如何不堪，都好过现有的”大热人选”。”Benny Tsang”话︰”基哥总好过小丽老母。””Jeff Li”反问︰”咁人哥同基哥我又撑基哥多d（啲）喎，虽然两个都废既（嘅），但至少基哥真系有系（喺）果（嗰）头小区工作，人哥做过d（啲）咩系（喺）九西区值得九西人投佢一票呀？”

传伙前战友图另起炉灶

其实呢，上次基哥参加”初选”时，佢段宣传片就已经讲明”今次系我最后一次参选”，咁都俾人闹一餐，实系有啲私怨嘅。有传佢会搵返前民协嘅人另起炉灶，咁??家仲喺民协嘅人当然条气唔顺啦。最近嗰次”支联会”搞嘅游行，基哥有去，其他民协嘅人都有去，但基哥贴喺fb张相就见唔到其他民协骨干，只系tag（标签）咗突变民协前中常委嘅李庭丰，而民协啲post都见唔到基哥身影，但就有劲多市民觉得好生面口嘅年轻人啰。

再睇吓啲追住民协二字嚟讲嘅留言先。”Js Sue”批基哥︰”民恊（协）？！都被佢玩到花儿也谢了......5（唔）走等乜？””Chi Kam”批民协︰”民协就系一班白痴（痴）仔喺度当家作主。议员（会）竞选协条（调）其他『泛民』都系左讲右讲。阻止民协嘅人蔘（参）选，以（而）民协办（班）白痴（痴）仔又以为大局为重。最后自己俾人灭党。”讲到呢度，大家明啦。

来源：文汇报