“占中三丑”之一嘅戴耀廷因为鼓吹”港独”备受社会各界狠批，反对派为咗撑吤[上要宣传选举，前晚搞集会话要”捍卫言论自由”，结果咪就系过唔到人都过唔到自己啰。当晚多名”独派”学生会中人投诉”民阵”唔畀佢哋上台发言，批评”大台”话尊重言论自由其实耍嘴皮子，最后都系”狗改不了吃屎”喎！唔少人就看透世事咁话，你估”泛民”真系捍卫言论自由咩，都系借议题为未来嘅选举造势啫。

称行政程序拒批发言

据浸会大学传理学院新闻系学生刊物《新报人》前晚报道，中大学生会会长区倬僖喺”香港民族阵线”嘅集会上话，有”民阵”职员拒绝畀佢哋上”大台”发言，原因系大会”只容许学联代表发言，而不容许学生代表发言”。

树仁大学学生会外务副会长暨学联常委张朗轩亦话，佢哋大前日同”民阵””接洽”时，大会容许佢上台发言，但前晚突然拒绝，佢对”民阵”嘅决定感到诧异，其后仲喺fb发帖讲返始末。

张朗轩话，佢哋通过学联表示，树仁学生会、中大学生会想发言，”民阵”都话冇问题，”但到现场后，我们表示想发言，『民阵』表示只接受学联代表发言。即使我身为学联常委，想以学生会或学界身份发言，（但）『民阵』表示不能够接受。”

佢又爆当时对方系咁讲嘅：”『如果个个都话学生会想发言咁咪好大获（镬）？』......当我地（哋）不分派别去支持言论自由，点解想上台发言都可以话『行政上问题』唔允许，我不能够接受有人要强加我系学联代表而唔系代表学生会或者学界。就是次『民阵』的态度与处理手段，我只能够表示遗憾并强烈谴责。”

唔少网民就留言批评”大台”文化。学联代表会署理主席张倩盈其后留言”晒冧”，话佢传讯息畀”民阵”fb专页，问佢哋有无”学界”发言时间，”睇怕当时误会咗我想代表学联发言”，所以就唔畀张朗轩以学界身份上台。不过，张倩盈都忍唔住呻句：”但讲真，学生会成员去到，我又有电话联络，当临时换个发言人有几难......行政问题......”

“独门”呻屈狗咬狗骨

“独”人之一、中大学生会代表会民选代表袁德智亦话：”发个言都系十分钟姐（啫）。行政程序只喺（系）借口，如果有心，就算加多个人应该点会唔俾（畀）你讲两句，『民阵』真喺（系）有趣。大台真喺（系）不了，以后『民阵』搞咩你都系咁先啦！””James Wong”则留言揶揄：”到今日咁嘅时局，『民阵』如果都冇呢个sense（触觉）分清学界、学联都真系个笑话嚟。”

有出席集会嘅”无待堂堂主”卢斯达也批评”民阵真系狗改不了吃屎”、”你以为言论自由是香港人的公因子，但『泛民』的公因子只有选举”。卢斯达仲指出，当晚长毛（梁国雄）讲讲吓就话要令”中共”知道唔系冇代价，下一步要全速开始”风云计划”，搞区选喎，”笑×死。”

回应偏帮”泛民”出晒面

“民阵”自己就发声明话，佢哋只系收到学联嘅要求，亦留咗时间畀学联，最终唔畀学生会上台发言，都系”民阵”代表同”泛民”议员助理”转告”，”以学联代表名义，而非个别院校学生会名义发言，较能为合办的各个方面，包括民主派会议各议员所『接受』。”

咁即系有传统反对派议员唔畀”独派”学生会上台讲嘢啦，言论自由喎。”独派”组织”学生动源”、”香港民族阵线”噚日都出咗声明闹”民阵”损害言论自由。

因”港独”言论而起嘅集会，最后唔畀”独派”讲嘢，最后得返班关注出年区议会选举、后年立法会选举嘅人发言，成件事都几典型吓。你以为”大台”唔知”港独”濑嘢、真系想畀你哋讲”港独”咩？你班学生哥咁都唔明？

来源：文汇网