香港《文汇报》报道，收人8,000几万去搞所谓“人道支援”，转个头泄漏受助者嘅资料出去，仲粉饰件事为“信息保安事故”，边个可以咁厚颜无耻？咪就系“612人道支援基金”囉！“612人道基金”明明识开记者会，但佢哋上周六起声称俾“黑客入侵”，泄漏咗48个受助人嘅资料后，竟然系事隔3日先喺facebook鬼鬼祟祟出个post就算，个题目就叫做“信息保安事故报告”，真系唔小心睇漏眼就唔知原来系泄漏资料咁大镬。有睇晒成个“报告”嘅支持者就愤怒留言︰“有48人资料外泄？有冇搞错！你对得住我哋！”

“612人道基金”嘅语言伪术都唔讲得笑，明明系泄漏“义士”资料，但系报告一开始就不断描述佢哋嘅加密技术同保密工夫，仲讲到话“每次只会摘取必须的（受助人）个人资料并以端对端加密方式传送”。

诿过“黑客入侵” 三天后始公布　

正当大家觉得好稳阵嘅时候，原来下一段先系重点，仲要讲到第四段先系事故始末。“612人道基金”话，有基金职员“操作失误”，喺上星期六晚11点半传电邮畀信托人嘅时候，唔小心冇移除包括受助人资料嘅附件，而信托人之一嘅陈日君个电邮咁啱得咁桥就喺咁上下时间俾“黑客入侵”，要到听日（周一）先修正返个问题，仲要到星期四先公布有个咁嘅问题。

咁个附件有咩呢？原来包括咗48个受助人嘅中文全名、收取支援类别（紧急经济支援、医疗费、心理辅导费及借保释金）同埋金额。“612人道基金”声称对受影响嘅人同公众“深切致歉”，又话会“改善行政制度，加强内部训练及监管，防止个人资料错误经电邮传出”等喎。

班“义士”蒙晒面咁上阵，走投无路向“612人道基金”申请援助，点知转个头就俾个基金笃灰泄漏个人全名，都咪话唔灰。虽然有啲人都仲系选择“无底线原谅”，但都有唔少人留言怒片“612人道基金”。“Chan Johnny”话︰“这样的事情不可能有错，你哋太大意啦！”“Au Welly”怒道︰“有48人资料外泄？有冇搞错！你对得住我哋！”“Siu Lam Chi”质问︰“你今次泄露受助人资料，咁下次会唔会泄露捐助人资料？”

网民挖黑材料吁勿再捐款　

“蔡根谈”就索性“612人道基金”算账︰“除左（咗）呢样要道歉外，你地（哋）对被捕者嘅严苛挑剔都令一班原本支持‘612’嘅香港人好嬲！”有网民就问有咩详情，“Kuma Sanki”似乎反晒白眼咁话︰“‘612有’几苛刻自己google下，4千几万有几多去左（咗）买音响，又有几多系帮到‘义士’，自己识计啦，十个有九个‘义士’有事求救只拎到几旧（嚿）水生活费咋，唔好下下做伸手党，自己fc（fact check查证）啦。”佢仲明倒“612人道基金”米，叫大家唔好再捐畀佢哋，要捐就捐畀第二个组织喎。

支援“义士”计到尽 放水欧游“手松”

睇“612人道支援基金”个工作简报，虽然真系好简约，但都学到好多嘢，例如咩叫“因果”、咩叫“同人唔同命”。“612人道基金”早前刻薄“义士”、厚待音响俾支持者闹爆，结果9月捐款大跌，由8月筹到3,400几万，9月截至20号竟然只系筹到660万唔到，呢啲咪叫因果。“义士”攞资助有冇容易到就唔知，但基金上月底出post割席，叫人“请勿再联络基金要求资助装备”，但同月就资助“香港大专学界国际事务代表团”喺伦敦、日内瓦嘅交通膳食，“民阵”同“民权观察”预支埋10月嘅费用，连同9月攞咗基金超过28万，呢啲咪叫“同人唔同命”。

买音响做臭朵 捐款跌逾千万

想睇“612人道基金”个报告都唔系咁易，事关你去佢个网站搵工作简报，佢会指咗你去睇佢8月头喺fb出嘅一个post，真正嘅工作简报就要自己喺最新消息嗰度慢慢搵。

搵得咁辛苦，当然要睇真啲。望吓佢哋盘 数，继 8月俾人闹完个基金“关心音响多过 ‘义士’”、“买音响易claim（报销）过医药费”后，9月份佢哋嘅捐款就全线大跌。喺10万蚊以下嘅捐款方面，7月6号至31号有近2,200万，8月亦有近3,300万，但9月更新到20号，竟然只得660万唔到；大额捐款方面，7月有110万，8月有120万，9月竟然系“暂无”，真系“生意惨淡”。

拒批钱买装备 援外游包膳食

唔知系咪因为收入少咗，“612人道基金”喺9月28日就出咗个post，叫啲人“请勿再联络基金要求资助装备”，摆明就系率先割席。佢哋话︰“购买装备或生活费并不是基金人道支援的范围。”唔怪得之啲“义士”搲极都冇钱啦。“612人道基金”仲声言，佢哋唔系支援运动嘅“抗争基金”，只系要为所谓“反送中运动”中受伤同被捕嘅人提供“人道支援”。

讲到咁样，当然又要再望下佢盘数。喺9月20日更新嘅工作报告入面，新增嘅仲有“香港大专学界国际事务代表团”去伦敦、日内瓦“海外游说”嘅“交通膳食”费用，唔知系咪惊饿亲佢哋好唔人道呢？

“民权观察”两个月狂执18万

再睇吓“民阵”，原来佢哋仲预支埋10月嘅钱，佢哋个“24小时被捕支援热线”9 月、10月攞到10万蚊资助；“民权观察”个“24小时被捕支援热线”同律师团队秘书处9月、10月都攞到超过18万资助。

我谂唔少人睇完都好心伤，咁样又算唔算系“反送中运动”中受伤嘅人呢？唔知有冇得claim呢？